Fifandirana niafara tamin’ny vonoan’olona feno habibiana tao amin’ny Distrikan’i Doany,  Andapa, omaly. Nokantsanan-drangahy antsy ny lohan-dramatoa vadiny. Efa voasambotry ny polisy ity nahavanon-doza.

Nampihoron-koditra! Ramatoa iray 33 taona no tapa-doha noho ny tsy fifankahazoana teo amin’izy mivady. Fantatra fa nifanditra efa hatramin’ny afakomaly izy roa ireto ka niteraka ny hevi-dratsy tao amin’ilay rangahy vadiny. Nataom-ba­diny an-keriny noho izany ity ramatoa ity ka nokapainy ny antsy ny lohany rehefa vita ny filany. Vokany, maty teo no ho eo ilay ramatoa ary nitsoaka nandositra ilay nahavanon-doza. Tetsy an-kilany, nandray ny andraikiny avy hatrany ny zandary tao an-toerana ka voasambotra, io omaly io iha­ny ilay nahavanon-doza. Araka ny fanazavan’ny kaomandin’ny kaompania An­da­pa, ny Kapiteny Razafimam­pi­an­dry, tena vadiny tokoa ity namono azy ity, nosamborina avy hatrany izy taorian’izay ary efa eo am-panaovana fa­na­dihadiana ity rangahy ity ny zandary, amin’izao fotoana izao. Andrasana, araka izany, ny tohin’ity raharaha vono olo­na tao Andapa ity. Tsia­hi­vi­na fa vao tsy ela akory no nisy lehilahy matin’ny fitsaram-bahoaka tao Mananara Ava­ra­tra noho izy nahavita na­mono ny rafozany sy ny vadiny. No­ra­sarasainy izy mi­anaka ka voa­tery nankarina haingana notsaboina taty an-drenivohitra noho ny ratra mafy nahazo azy. Niafara tamin’ny fahafatesany anefa izany. Nandeha ny fikarohana ilay vadiny manerana ny tanàna ka nifanehatra tamin’ny fokonolona ihany izy ary niafara tamin’ny fitsaram-ba­hoaka izany.

Tsiferana Randriatiana