Oops! It appears that you have disabled your Javascript. In order for you to see this page as it is meant to appear, we ask that you please re-enable your Javascript!
Flash
Préc Suiv

Hevitra mandalo; resaky ny mpitsimpona akotry: Lahitokana  ny aina

Indray mandeha ihany no velona. Mazava ho azy fa indray mandeha ihany koa no maty. “Aleo maty rahampitso toy izay maty androany”, hoy ny Ntaolo Malagasy. Midika izany fa mamy ho an’ny rehetra ny miaina. Fa raha ity lozam-pifamoivoizana mitranga etsy sy eroa sy ny voka-dratsiny ity no jerena, toa alaim-panahy ihany ny tena hilaza fa toa tsy misy iraharahian-dry zalahy izany. Aiza ka efa saika ho isan’andro no ahenoana na ahitana tranga miseho eny amin’ny lalana eny ambanivohitra sy aty andrenivohitra.

Isan’andro ihany koa, tsy mitsahatra mitatitra tranga nahafaty olona sy/na nandratrana olona ary nahasimbana fitaovana ny gazety eto andrenivohitra sy ny tambajotran-tserasera. Mandeha ny fanentanana isan-karazany ataon’ireo mpisehatra isan-tsokajiny sy ny mpitandro filaminana fa toa tsy misy fiovana ny toe-draharaha. Vao mainka aza mitombo ny maty sy maratra vokatry ny tsy fitandremana.

Raha nalaza ratsy ny loza mahazo ireo fiara Sprinter tany aloha tany, tato ho ato dia ireo moto sy skotera indray no tena niharan-doza matetika. Arak’ilay fomba fitenintsika azy matetika hoe “carrosserie tenany” anefa ny kodiarandroa dia mazàna farafahakeliny maratra ny mpitondra azy. Raha ratsy vintana moa dia mamoy ny ainy. Voa eny ihany anefa izay voa fa ireo izay tsy mbola niharany toa tsy miraharaha fa misetrasetra eny an-dalana rehetra eny. Avy aiza ny fototry ny olana?

Ny zava-misy azo antoka aloha dia maro loatra ireo mahay mitondra fotsiny fa tsy mahafehy familiana kodiarandroa na koa tsy manana fahazoan-dalana hitondra akory. Misy mantsy dia tena mbola zaza tokoa nefa efa mitondra skotera. Dia hatao hahagaga ary ve raha marobe ireo maty na maratra? Misy tokony hojerena maika mahakasika izany. Ny momba ny lalàna mifehy ireny karazam-pitaterana ireny koa tokony hasiana fanaraha-maso akaiky mba tsy ho ara-dalàna ny famaizana raha toa ka izay no lalana farany hampihenana ny maty sy maratra.

 

Mparany

Les commentaires sont fermées.