Nanao fanambarana ho an’ny vahoaka malagasy indray ny filoha  Rajoelina Andry, halina. Tafakatra 12 ireo voan’ny Coronavirus, hatramin’izao. Noho izany, tsy maintsy naka fanapahan-kevitra sy fepetra ny fanjakana  manoloana ny fihanaky ny aretina.

Anatin’ny fe-potoam-pahamaizana ara-pahasamana. “Manomboka rahampitso (anio), mijanona any an-trano avokoa ny rehetra. Mijanona  tanteraka ny fitateram-bahoaka na an-tanàn-dehibe na ny zotra nasionaly.  Mijanona avokoa ny  taxi-be sy taxi ary ny taksiborosy. Ny fiara fitaterana entana ihany sisa mamatsy entana  any amin’ny faritra  sy ny distrika”, hoy ny filoham-pirenena. Misokatra kosa ny grande surface, ny mpamongady, ny tsenakely… “Afaka misokatra avokoa ireo tsenam-pokontany, manomboka amin’ny 6 ora maraina hatramin’ ny 12 ora… Olona iray isan-tokantrano ihany no afaka mandeha miantsena”, hoy ihany  izy. Misokatra hatrany  kosa  ireo fivarotam-panafody, ny tobin-solika,  ny banky.

Tsy fahazoana mivezivezy amin’ny  alina

Mihatra, manomboka anio koa ny fepetra tsy fahazoana mivezivezy amin’ny alina, manomboka amin’ny 8 ora alina  ka hatramin’ny 5 ora maraina. Mikatona avokoa ny biraom-panjakana  afa-tsy ny ho an’ny fahasalamana sy ny fitsarana.  Eo koa ny filaminam-bahoaka ary koa ny Jirama.  Miasa tahaka izany koa ireo eo anivon’ny fifandraisan-davitra, ny haino aman-jery sy ny mpanao gazety. “Anjaran’ny sehatra tsy miankina ny mandrindra mandamina ny asa afahany  mampihodina ny orinasa”, hoy ny filoha.

Hofehezina ny vidin’entana

Horaisina ny fepetra hamehezana ny vidin’entana, araka ny nambarany ka hosazina ireo tsy manaraka izany. “Tsy fotoan’ny fanararaotana  izao. Aoka izay ny fitiavan-tena.  Mila  mifampitsonjo isika ary ho henjana ny fampiharana  ny lalàna”, hoy izy.

Na izany aza anefa, mihatra ho an’Antananarivo Renivohitra sy ny faritra Analamanga ary Toamasina  ireo fepetra ireo.  Horaisina miandalana kosa, miankina amin’ny fivoaran’ny  valanaterina ny faritra hafa. “Iarahana manatanteraka amin’ny governora sy ny prefet ary ny ben’ny Tanàna sy ny mpitandro filaminana ireo rehetra ireo”, hoy  ihany  ny filoha.

Nialoha izany, nambaran’ny filoham-pirenena fa nisy olona sivy hafa indray tratran’ny coronavirus, tonga  tamin’ny herinandro lasa teo. Teratany vahiny ny telo : Frantsay roa sy Gineanina iray ary Malagasy kosa ny ambiny.  Manodidina ny 43 hatramin’ny 60 taona mahery  izy ireo ary tonga avy  any Frantsa  avokoa. Tafakatra 12 izany izao ireo voan’ny coronavirus, hatramin’ny omaly alina.

Hosazina  ireo mamoaka vaovao tsy marina

Anisan’ny antony nahatara  ny fanambaran’ny filoha ny fiandrasana  ny valin’ny fitiliana  ireo  olona ireo teny amin’ny Institut Pasteur.  Efa noraisina avokoa ny fepetra  rehetra momba azy  ireo sy ny fanaraha-maso ny toe-pahasalamany.

“Ho hentitra  ny fanjakana  amin’ireo manaparitaka  vaovao tsy marina. Ho henjana ny   fandraisana andraikitra sy ny fanasaziana na amin’ny alalan’ny “facebook” na amin’ny  fampahalalam-baovao samihafa”, hoy izy. Nampahery ny vahoaka ny filoha ary nanambara fa  hiresaka sy hitafa amin’ny vahoaka ny tenany, isaky ny amin’ny 8ora alina amin’ny TVM/RNM.

Synèse R.