Oops! It appears that you have disabled your Javascript. In order for you to see this page as it is meant to appear, we ask that you please re-enable your Javascript!
Flash
Préc Suiv

Voka-pifidianana: lasan’ny IRK ny ben’ny Tanàna amin’ny renivohi-paritra

Voka-pifidianana: lasan’ny IRK ny ben’ny Tanàna amin’ny renivohi-paritra

Nataon’ny IRK telimoka  avokoa ny ankamaroan’ireo renivohi-paritra na tanàn-dehibe amin’ny fahazoana ny toerana maro eo amin’ny ben’ny Tanàna. Na izany aza, nahatafiditra ben’ny  Tanàna koa ny tsy miankina  sy ny Tim…

 Anisan’izany ny eto Antananarivo Renivohitra amin’ny  nahavoafidy an’Andriantsitohaina Naina, nahazo ny 49%.  Hanao ny famindram-pahefana amin’ny  ben’ny Tanàna  teo  aloha, etsy amin’ny lapan’ny Tanàna,  ny alakamisy ho avy izao ny tenany.  Vehivavy kosa ny IRK voafidy ao  Fianarantsoa, amin’ny  alalan-dRatsimbazafy Sahondra. Nibata ny 45% izy raha laharana faharoa ny Tim ary any amin’ny fahatelo ny ben’ny Tanàna HVM teo aloha, nirotsaka amin’ny  mahaleo tena i Harilalaina Irma. Ny mpanakanto Nantenaina kosa no ben’ny Tanàna avy amin’ny IRK ao Toamasina, nahazo ny 34% raha laharana faharoa ny MTS, Ratsiraka Roland, 32%. Mbola tafaverina amin’ny toerany ary nahazo salanisa ambony 66%  ny ben’ny Tanànan’i Mahajanga teo aloha, Andriantomanga Mokhtar Salim.

Tsy miankina ny ao Antsiranana, Nosy Be… 

Mbola an’ny IRK koa ny ben’ny Tanàna ao Toliary amin’ny  alalan’i Vita Sidison Dede. Tahaka izany ny any Taolagnaro, nahazo 64% ny avy amin’ny IRK, Randrianiaina Georges Mamy.

Lasan’ny tsy miankina kosa anefa ny ao Antsiranana ary mbola voafidy fanindroany amin’izany toerana izany i Djavojozara Jean Luc, nahazo 50%. Avy amin’ny mahaleo tena koa ny any Nosy Be, amin’ny alalan’i Vita Golbert.

Etsy an-daniny, votsotra teo an-tanan’ny Tim ny ao Antsirabe. Lasan’ny IRK Rasamimanana Honoré Gabriel izany tamin’ny nahazoany ny isam-bato 55% raha 29% ny vaton’ny ekipan-dRavalomanana, Randrianarisoa Guy Rivo.

Lasan’ny Tim ny eny Ambohitrimanjaka, Ivato…

Ankoatra izany, norombahin’ny Tim avokoa ny ben’ny Tanàna amin’ireo hanatanterahana ny tetikasa Tana-Masoandro.  Anisan’izany ny eny Ambohitrimanjaka, amin’ny alalan-dRandriamanalintsoa Ihajason nahazo vato 47%. Mbola samy Tim  avokoa ny eny Ankadimanga sy Ambohidrapeto. Nahazo 33% sy 43% avy Razafinanja Befandroana sy  Andriantsilavo Mihary. Tanàna stratejika mbola lasan’ny Tim koa ny eny Ivato ary mbola nametrahan’ny  vahoaka fitokisana tamin’izany i Penjy Randrianarisoa rehefa nahazo 59% raha 31% ny an’ny  IRK, Rasoamiaramanana Goddfrin.

Tsiahivina fa haverina afaka 120 andro kosa ny fifidianana ben’ny Tanàna ao  Moramanga, araka  ny didim-pitsarana navoakan’ny Taf  Toamasina. Nandresy vonjimaika ny Tim any an-toerana raha  ny voka-pifidianan’ny  Ceni.

Synèse R.

Laisser une réponse

Votre adresse email ne sera pas rendue publique