Oops! It appears that you have disabled your Javascript. In order for you to see this page as it is meant to appear, we ask that you please re-enable your Javascript!
Flash
Préc Suiv

Hamonjy fivoriamben’ny anglikanina tany Ambanja: mpandeha roa maty tanaty lozam-piarakodia

Hamonjy fivoriamben’ny anglikanina tany Ambanja: mpandeha roa maty tanaty lozam-piarakodia

Nisesisesy ny lozam-pifamoivoizana tamin’ity herinandro ity. Mazda nitondra mpivavaka hamonjy ny fivoriamben’ny anglikanina no niharan-doza tany Ambanja. Tranga hafa, namoizana ain’olona roa ihany koa no niseho tany Manakara…

Teny Antsakoamaondro, lalam-pirenena fahenina ao Ambanja, ny nahitana loza nahafatesana olona roa raha hihazo an’Ambilobe ny fiara Mazda iray, ny alakamisy teo manodidina ny tamin’ny 10 ora sy sasany. Araka ny fanazavan’ny kaomandin’ny zandarimaria ao an-toerana, teo amin’ny 12 kilometatra tsy hiditra an’Ambanja ny niseho ny loza ary namoy ny ainy tamin’izany ny lehilahy 83 taona sy ny vehivavy 42 taona. Nambaran’ny loharanom-baovao fa nitondra mpivavaka hamonjy ny fivoriamben’ny anglikanina ao Ambanja ilay fiara tra-doza. Nifatratra tamin’ny hazo rehefa niala  ny arabe ilay fiara. Fantatra koa fa niala mpitondra bisikileta nitondra saribao izy tamin’izany. Fanampin’izany ny fandehanana mafy ka nampifatratra azy teny amin’ny hazo. Araka ny fantatra, manodidina ny roampolo ny mpandeha tamin’io fiara io ary naratra avokoa raha mpandeha tsotra kosa ireo niharam-boina. Taorian’ny loza, nentina tany amin’ny Clinique Saint Damien sy ny hopitalin’Ambanja ireo naratra ary fantatra ankehitriny fa tsy misy atahorana ny ainy.

Mpandeha roa hafa maty tany Manakara

Olona roa ihany koa namoy ny ainy ny alarobia teo vokatry ny lozam-pifamoivoizana teo Mavorano noho ny fandehana mafy nataon’ny fiara Sprinter, nitondra mpizaika FBL na Fikambanam-behivavy loterana, manodidina ny tamin’ny 9 ora teo akaikin’ny tetezana Lapapa. Raha ny angom-baovao, namoy ny ainy teo no ho eo ny zazavavikely tokony ho 4 taona sy ny zazalahikely 6 taona vokatry ny loza raha tsy mbola mahatsiaro tena ny zaza izay fantatra fa 26 volana ary ahina mafy ny ainy, araka ny fanambaran’ny mpitsabo. Raha ny tatitra voaray, miisa 32 ireo naratra mafy, ary zaza amam-behivavy avokoa ny ankamaroany, isan’izany ihany koa ny mpamily ny fiara. Ratra nahazo azy ireo ny amin’ny tanana sy tongotra. Fiara nandalo ny nitondra ireo niharam-boina ao amin’ny Centre Hospitalier de Référence de Manakara, raha ny fanazavana voaray. Fantatra fa mpizaika avy any Ifanadiana ireo niharam-boina ireo ary saika hamonjy ny zaikabe ao Manakara.

Toamasina

Tranga iray ihany hafa koa nanaitra ny mpandeha ny teo amin’ny lalam-pirenena faharoa tamin’ny  kamiobe iray nandona fiarakely miisa roa raha hihazo ny aty an-dRenivohitra ireto farany, omaly maraina manodidina ny tamin’ny 8 ora latsaka fahefany. Araka ny loharanom-baovao, nangalatra ny sisiny havanan’ny arabe ity kamiobe ity ka nandona ireo fiarakely roa ireo ary nivadika avy hatrany. Araka ny fantatra, tsy nisy ny aina nafoy tamin’ny loza. Kamiobe iray hafa ihany koa ny nivadika ny zoma iny vokatry ny fitondrana entana mavesatra loatra. Raha ny fantatra, nandeha mafy ity farany, niala lavaka ka nivadika avy hatrany.

 

Henintsoa Hani

Les commentaires sont fermées.