Oops! It appears that you have disabled your Javascript. In order for you to see this page as it is meant to appear, we ask that you please re-enable your Javascript!
Flash
Préc Suiv

Drafitr’asa Kazan: hitondra zava-baovao ho an’ny Spaoro Afrikanina

Drafitr’asa Kazan: hitondra zava-baovao ho an’ny Spaoro Afrikanina

Hatolotra hodinihin’ireo minisitra afrikanina miisa 20 mianadahy, anio, ilay drafitr’asa Kazan, novolavolain’ny manam-pahaizana manokana 80 avy amin’ny firenena 37. Drafitr’asa hanovana endrika ny fanatanjahantena aty Afrika, tafiditra amin’izany ny fampandrosoana anatin’ny fahasalamana sy ny fandriampahalemana, fanafoanana ny  fanilikilihana ireo olona manana fahasembanana ara-batana, ary ny fampitoviana zo ny lahy sy vavy, eo amin’ny fanaovana fanatanjahantena. Omaly, nandritra ny lanonam-panokafana ny fivoriambe rezionaly voalohany, natokana ho an’ireo minisitra afrikanina, ho amin’ny fanatanterahana aty afrika ilay drafitrasa Kazan(PAK), nisy ny lahateny nataon’ireo solontenan’ny atleta malagasy izay tafiditra anatin’ireo fepetra ireo, nahitana an’i Yaelle, mpilalao tenisy, i Tahiry, mpanao fanatanjahantena manana fahasembanana ara-tsaina ary i Marcelia, vehivavy milalao rugby any amin’ny faritra Atsimo. Porofo sahady izany fa tena efa anatin’ny fanatanterahana tanteraka ity drafitr’asa ity.

“Hiova tanteraka ny fomba fijery an’i Afrika, manomboka izao, ka tsy hiady farany intsony fa ho lohany, eo amin’ny fanatanjahantena”, araka ny hafatra goavana nomen’Andriamatoa Minisitra Tinoka Roberto, omaly. Antenaina fa tena hitondra ainga vao ho an’ny Spaoro Afrikanina tokoa, araka izany, ity drafitr’asa ity ary efa hita ho mankato sy resy lahatra avokoa ireo solontena iraisam-pirenena, avy amin’ny Unesco, ny CIO (Comité International Olympique), ny Confejes sy ireo Minisitra marobe.

 Ankoatra ny fanokafana ity fivoriambe ity, nisy ihany koa  ny fanaovan-tsonia teo amin’ny firenena maraokanina sy i Madagasikara, izay nanaovan’ny minisitra Tinoka Roberto sy ny Ambasadaoron’i Maraoka, sonia,  ilay taratasim-piaraha-miasa ho fanatsarana ny fanamafisana ny fahalalan’ny tanora malagasy amin’ny alalan’ny Akademia Nasionaly.

Mi.Raz

Laisser une réponse

Votre adresse email ne sera pas rendue publique