Mahery fo ary tsy mbola nisy tahaka  iny ! Hotanterahina, anio  eny Iavoloha  ny fandraisana amin’ny fomba  ofisialy ny Barea taorian’ny fitsenana azy ireo tonga an-tanindrazana, avy niatrika ny Can. Handray azy ireo ny fitondram-panjakana  manontolo, hotarihin’ny filoha Rajoelina. 

Nosokajiana ho “Maherifon’ny firenena” ireo mpilalaon’ny Barea. Hotolorana ny mari-bonihitra izy ireo, anio noho ny dingana vitany sy ny ezaka nataony teo amin’ny Can, natao  tany Ejypta farany teo. Tsy vitan’izany fa efa nampanantena tambiny ho azy ireo ny  fitondram-panjakana  amin’ny alalan’ny filoha Rajoelina. Mendrika izany rahateo ireto mpilalao sy ny mpitantana ireto.

Mandram-piandry izany, nangorom-potsy  sy mena  ary maitso  ny nolalovan’ny  Barea tamin’ny  fahatongavana avy eny Ivato nihazo ny Renivohitra, ny asabotsy  teo. Tsy mbola nisy tahaka  izany teo amin’ny  tantaran’ny firenena.

Safotra nahita an’i Adrien  Melvin

Tafahoatra sy tsy voafehy hatramin’ny fitiavana ny Barea  sy  ireo mpilalao  ka safotra nandritra ny minitra vitsy ny tovovavy roa  nahita maso  akaiky ny mpiandry  tsatoby Adrien Melvin naneho sary fo amin’ny alalan’ny tanana  tao anaty fiara nitondra ny ekipam-pirenena teny Ivato. Tao koa ireo nanoroka ny fitaratry ny fiara  tamin’i Voavy Paulin.

Nitohy teny  Antaninarenina  nitobian’ireo mpilalao,  omaly  ny fakana sary.  Nilaharana ny “seflie” miaraka amin’ireo  mpilalao.

Na izany aza, hita taratra ny goragora teo amin’ny fandaminana  sy ny fikarakarana  iny fitsenana ny Barea iny. Nanomboka  teny amin’ny seranan’Ivato hatreny an-dalana sy taty an-dRenivohitra.  Hadino sy tsy hita hatramin’ny mpilalao roa…

Nandraisana fepetra ny  hamaroan’ny olona…

Tokony efa  nampoizina ny hamaroan’ny  olona ka nandraisana  ny fepetra mifandraika amin’izany. Tena sahirana ireo mpitandro filaminana noho ny  havitsiany na nanao ny ho afany aza. Manamafy izany ny ratra noho ny fianjeran’ny mpilalao i Amada. Nijanona  tampoka  ny fiara nitondra azy ireo  noho ny fiampitan’ny moto iray nanoloana ilay “car” be notaingenan’ny  Barea tetsy Tsarasaotra. Tsy nahagaga raha ora valo be izao ny nanaovana iny lalana 20km latsaka iny na natao tao anatin’ny fifaliana aza izany… Nisy nihoa-pefy.  Tanàna tsy ilaozan’adala.  Tsy nahafa-po ny  maro  ny fampitana mivantana nataon’ny TVM izany  rehetra izany…

Manoloana ireo, tsy mazava ny fifampizarana  andraikitra. Ofisialy sa tsia iny hetsika  iny ? Ahoana ny fiahiana sy fiantohana ny filaminana, indrindra ho an’ny filoham-pirenena mivady. Nampiandrasana ora maro tetsy Mahamasina izy ireo sy  ny mpikamban’ny governemanta. Alina rahateo ny andro.  Eo koa  ny momba ireo mpilalao sy ny fiantohana ny ain’izy ireo.  Ny lafiny arofenitra sy ny fametrapetrahana ny ora  ary ny fotoana rehetra.

Loto sy fako ary ny fahapotehana

Manampy ireo, niseho indray koa ilay tsy firaharahana ny fotodrafitrasa sy ny  fahadiovana  noho ny tsy firindran’ny  fandaminana. Potika ny ampahany amin’ny fefin’ilay seranam-piaramanidina vaovao eny Ivato.  Tahaka izany  koa ny fahapotehan’ny fefy sy ny voninkazo etsy Mahamasina. Ny loto  sy ny fako ary ny fofona tsy lazaina  intsony… Hiasa mafy indray ny mpanadio tanàna  ao amin’ny CUA… Tahaka izany hatrany isaky ny misy hetsika eto an-tanàna.

Hakana lesona hitsenana  ny Papa  François

Araka izany, tokony hahay haka lesona  isika amin’ny tranga  tahaka ireny. MBa ho matihanina  kokoa.  Eo ny fifampizarana andraikitra sy ny fandaminana  rehetra. Ho avy ny Papa François,  ny 6 septambra izao… Iza ny manao inona amin’io fotoana  io ?

Synèse  R.