Mandray ny andraikitra tandrify azy. Nijery ifotony sy nifampidinika amin’ireo tompon’andraikitra ao an-dRenivotr’i Boeny  amin’ny fanomanana sy fikarakarana ny fandraisana  ny  fihaonamben’ny tanora katolika JMJ Mada, andiany fahasivy, hatao any Mahajanga ny Praiminsitra Ntsay  Christian, ny  faran’ny herinandro teo.

Anisan’ny noresahina tamin’izany ny  momba ireo toerana handraisana ireo tanora maherin’ny 50  000 ho avy any an-toerana, manomboka ny 8 hatramin’ny 14 oktobra izao.  Anisan’izany ireo toerana  ho an’ny vahiny, ny sekoly,   ny fampidirana rano  fisotro  na koa ny siniben-drano  maherin’ny 30 hampiasaina.

Fandriampahalemana sy  ny  pesta

Manampy izany ny lafiny fahadiovana sy ny fanadiovana. Notsindrin’ny lehiben’ny governemanta manokana ny fitandroana ny filaminana sy ny fandriampahalemana  ary ny pesta. “Tsy maintsy raisina avokoa ny  fepetra rehetra amin’izany fahavorian’ny tanora marobe  izany. Efa ao anatin’ny fampielezan-kevitra koa isika ka ilaina ny fitandremana.  Tsy tokony hisy ny fitongilanana eo amin’ny tompon’andraikitra. Hamafisina ny  fahadiovana mba hisorohana ny valanaretina ka tokony ho samy  handray andraikitra ny rehetra”, hoy ihany izy.

Fanentanana ny mpifidy  hanamarina ny anarany…

Taorian’izany, nidina ifotony tahaka ny efa fanaony nijery ireo pitsompitsony amin’ny fanomanana ny fifidianana tahaka ny efa nataony tany Ialasora, distrikan’i Fandriana, Faritra Amoron’i Mania, ny delegasiona notarihin’ny Praiminisitra  Ntsay  Christian.  Nanaovana tombana  tamin’izany   ny ezaka efa vita ka anisan’izany ny fahatongavan’ny lisi-pifidianana eny anivon’ny fokontany. Efa hita taratra koa  fa mandray ny andraikitra tandrify azy ny Ceni mba hivoahan’ny kara-pifidianana, araka ny fotoana ilana azy.  Nanentana ny olom-pirenena rehetra ny Praiminisitra Ntsay  Christian mba hijery sy hanamarina ny anarany ao anatin’ny lisi-pifidianana. “Zon’ny tsirairay ny mifidy ary mba hisian’ny mangarahara sy hananan’ny rehetra fitokisana amin’izany fifidianana hotanterahina izany koa ny fanamarinana ny ao amin’ny lisi-pifidianana”, hoy izy.

Synèse R.