Oops! It appears that you have disabled your Javascript. In order for you to see this page as it is meant to appear, we ask that you please re-enable your Javascript!
Flash
Préc Suiv

Fitsidiham-paritra: takin’ny vahoaka any ifotony ho kandidà Rajoelina

Fitsidiham-paritra: takin’ny vahoaka any ifotony ho kandidà Rajoelina

Samy naneho ny heviny  sy niantsoantso avokoa  ireo  vahoaka any amin’ny faritra notsidihin’ny filohan’ny Tetezamita, Rajoelina. Anisan’izany ny any Maroantsetra. Vory lanona ny  vahoaka niandry azy.

Faly amin’ny fahatongavanao eto  izahay. Mahavelombolo ny fahatongavanao aty aminay. Ela ny ela niandrasana anao ka tonga ianao. Tia anao ny vahoaka… Porofo izao vahoaka tonga eto izao. Miangavy anao izahay mba hilatsaka hofidina ho filoham-pirenena. Marary izahay mba tsy hilazana hoe miala aina mihitsy. Tsy manana aba izahay  hatramin’ny  nialan’i Tsiranana. Abanay  ianao. Vonona hanohana anao  izahay”,  hoy  ny ankamaroan’ireo vahoaka ao Maroantsetra, ny 28 jona  teo. Notsenaina makotrokotroka  ny filohan’ny Tetezamita, Rajoelina tany an-toerana. Nomen’ny tangalamena sady filohan’ny fikambanan’ny zokiolona tso-drano ho tonga amin’ny tanjona  iriana  ny mpanorina ny  Mapar. Mazava  ny valin-teny.   “Tsapako tokoa fa tena tia ahy i Maroantsetra. Tena tiako ianareo. Tsy maintsy mandresy isika ary tsy maintsy ampandresetsika i Madagasikara manoloana ny fahantrana”, hoy izy. Nambarany fa mamokatra sy manan-karena iny faritra  iny, saingy tsy mbola misitraka izany ny vahoaka. Nampanantena ny tenany ho amin’ny vahaolana hampandrosoana an’i Madagasikara. « Tsy ianareo eto ihany ny miaina ao anaty haizina fa i Madagasikara iray manotolo.  Hitondra hazavana ho anareo aho…”, hoy ihany izy.

Hovahana amin’ny IEM  ny olana…

Nihemotra hatrany ny firenena, araka ny fampahatsiahivany.  Natsidiny avy hatrany anefa  fa hitondra vahaolana maharitra ny IEM. Tanterahiny rehefa ambaran’ny  vavany.  “Matokia.  Tsy hamadika anareo aho. Hataontsika  eto Maroantsetra ny fampandrosoana tsy hitan’i Madagasikara tao anatin’ny fotoana maro ary hataontsika ato anatin’ny fotoana fohy  izany”, hoy ihany izy.  Notanisainy ireo fanamby nambarany ary  tanteraka avokoa. Anisan’izany ny lapan’ny Tanàna etsy Analakely, ny trano mora, ny kianja manara-penitra…  « Ampio aho mba ahafahako manampy anareo satria mila miray hina isika. Mila miray saina sy fo ary mifanome tanana hahafahako manavotra an’i Madagasikara”, hoy izy. Tsiahivina  fa efa nandalo tany Boeny, Sofia ary izao tany  Analanjirofo izao ny mpanorina ny IEM, Rajoelina.

Synèse R. 

 

Les commentaires sont fermées.