Oops! It appears that you have disabled your Javascript. In order for you to see this page as it is meant to appear, we ask that you please re-enable your Javascript!
Flash
Préc Suiv

Hetsika Rohy : “governemanta teknisianina no vahaolana”

Hetsika Rohy  : “governemanta teknisianina no vahaolana”

Anisan’ny dingana lehibe hamahana ny krizy ny fametrahana governemanta teknisianina. Mendrika izany, tsy mitanila, manana fahaiza-manao hitantana ny firenena ao anatin’ny fotoana voafaritra, ary manomana sy miara-miisalahy amin’ny Ceni, hanatanteraka ny fifidianana.

Fanambaran’ny hetsika Rohy, afakomaly, io, momba ny fananganana governemanta Ntsay Christian. Governemantan’ny fanavotam-pirenena ahitana teknisianina no vahaolana hivoahana amin’izao krizy izao. Tsy mpikambana ary tsy miandany amin’ny antoko politika izany, afa-kitantana amin’ny fomba tsy mitanila sy eken’ny rehetra ny fifidianana. Eo koa ny fiandraiketana ny fampandehanana ny raharaham-pirenena.

Mila miomana amin’ny fifidianana ny antoko

Na tsy tena demokratika sy tsy nandraisan’ny rehetra anjara aza ny fanendrena ny Praiminisitra Ntsay Christian, azo heverina fa teknisianina izy: tsy manana loko politika, afa-mametraka governemanta sy fomba fiasa tsy mitanila. Mila tohizana izay fomba fiasa izay amin’ny fanendrena minisitra: teknisianina, mendrika, tsy miandany. Mba tsy ady sy fizaran-tseza fotsiny izany.

Mila samy miomana amin’ny fifidianana ny antoko sy ny mpitarika politika, miatrika sy miandry ny vokatr’izany, hahazoany mitondra sy manatanteraka ny programa fampandrosoana. Tsy mety raha sady mpitsara no mpilalao amin’ny fifidianana ny antoko. Izay no mahatsara ny tsy hitsabahany amin’ny governemanta hiara-miisalahy amin’ny Ceni amin’ny fikarakarana fifidianana, ary ny fitantanana ny firenena amin’ny fotoana voafetra.

 Tokony ho amin’ny volana oktobra ny fifidianana

 Tokony ho amin’ny volana oktobra ny fihodinana voalohany, hahazoana mamarana sy manapariaka ny lalàna. Mba hananan’ny Ceni sy ny governemanta ary ny mpiantsehatra hafa fotoana hiomanana amin’ny fanatanterahana ny fifidianana izany.

Tsara hatomboka ho fomba fiasa hametrahana ny rafitra sy ny olona amin’ny governemanta tsy mitanila ny fanaovana mangarahara. Eo koa ny fandavana ny kolikoly, indrindra amin’ny fitantanam-bolam-panjakana. Toy izany koa amin’ny fanendrena sy ny famindran-toerana amin’ny asam-panjakana amin’ny minisitera.

R. Nd.

Les commentaires sont fermées.