Nanao tohivakana  ny hetsika  fakana  ny mpiasam-panjakana  ho  fampikatsoana ny  fampandehanan-draharaham-panjakana, manomboka  izao. Nihazo  ireo minisitera maromaro eny  Anosy  ireo  vahoaka notarihin’ny  depiote ho an’ny fiovana, omaly tontolo andro. Nanombohana izany ny minisiteran’ny  Fanabeazam-pirenena,  ny Fambolena,  ny Fitaterana, ny  Fanajariana  ny  tany, ny Fananan-tany, ny Fifandraisana  sy ny  serasera.  Nye o anivon’ny Raharaham-bahiny…  Nihazo ny  teny amin’ny minisiteran’ny Mponina, ny Rano, hatreny amin’ny Jirama Ambohijatovo Ambony. Efa nivonona amin’ny fanalahidy sy rojo be hatrany  izy  ireo nanidiana ny  varavarana fidirana rehefa nivoaka avokoa  ny mpiasa. “Tsy misy mpiasa miverina miasa aty intsony, manomboka  rahampitso (anio)  raha tsy misolo ny minisitra  sy ny tale samihafa. Asa tsy vita  hoatra izay , tsy vita  intsony. Rakotra kolikoly ny  asam-panjakana  ka tsy  ekena izany”, hoy ny mpitondra  tenin’ny depiote, namarana ny hetsika rehetra natao, tetsy amin’ny kianjan’ny 13 mey, omaly.

Anisan’ny nanaovan’izy ireo hetsika koa  ny tetsy amin’ny HCC Ambohidahy.  Tsy nahazo niditra  ireo vahoaka marobe satria efa niatrana ny Emmo/Reg.

 Ho tompon’andraikitra amin’ny didy havoakany ny HCC

Na  izany aza, nihaona fohy  tamin’ny tompon’andraikitra ao an-toerana izy ireo.  Nambaran’ny eo anivon’ny HCC fa mila miasa  am-pitoniana ny mpitsara avo. Novalin’ny depiote anefa izany ka nilazan’izy  ireo  fa tokony hojerena haingana ireo  fitoriana nataon’izy ireo. “Maika ny vahoaka mitady fanovana. Ajanony any  iny lalàm-pifidianana  tsy misy ilana azy iny.  Ekeo  ny fialan’ny filoham-pirenena. Aoka mba hamoaka didy  mampilamina  ianareo fa tsy hitondra ny firenena any  amin’ny  korontana. Ho tompon’andraikitra amin’ny didy  havoaka  eo ianareo HCC”,  hoy  izy  ireo.

Hitohy anio, ny  hetsika. Hanao ahoana anefa  izany  satria efa namoaka fanambarana mivantana  sy ankolaka ho azy ireo ny fianakaviamben’ny Foloalindahy , omaly.

Synèse R.