Nitondra ny famakafakany ny fahitany ny raharaham-pirenena  ny talen’ny famoahana eo anivon’ny vondrona  Ultima média, Ramarosaona Franck, omaly tao amin’ny fandaharana “Ambarao”,  eo anivon’ny onjampeo Alliance 92  FM. Nivoitra tamin’izany ny nanambarany  fa tokony hirosoana ny fifidianana mialoha ny fotoana.

 Nambarany fa anisan’ny  tadiavin’ny vahoaka ny fitoniana mba tsy hisy fiantrakainy amin’ny toekarena  izao  hetsika izao. Efa misy izany izao ny fepetra savaranonando  sady malaza ny  amin’ny tokony hialan’ny mpitondra  raha hanelanelana ny raharaha ny FFKM sy ny CFM,  araka   ny nambarany. “Miala aloha izany ny filoham-pirenena rehefa miteny ny HCC fa tsy mifanaraka amin’ny lalàmpanorenana  ny lalàm-pifidianana. Hampiasaina ny lalàna teo aloha. Manao fanambarana  ny  fanjakana fa hatao amin’ny volana jolay  ny fifidianana, andraisan’ny  rehetra anjara sy tsy manilika”, hoy izy. Nanteriny fa afaka mirotsaka amin’izany avokoa Ravalomanana sy Rajoelina ary koa ny filoha am-perinasa. Hatsangana  ny governemanta  tsy miandany  ho fanavotam-pirenena hitantana ny fifidianana,  saingy tsy mahazo mirotsaka  hofidina  izy ireo.  Mampandeha ny  raharaham-panjakana  fotsiny  ihany,  araka ny nambarany. “Ho tonga amin’ny diabe mihazo ny eny  Iavoloha anefa ny  raharaha raha mbola miziriziry tsy hanaiky izany  kisarisary izany ny filoha am-perinasa.  Ho  hitany eo hoe ireto ny  vahoaka mitaky ny fialako”, hoy ihany izy.

Miala  rehefa tsy mahay mitondra firenena

Nitondrany ny heviny koa ny  momba  ny fampakarana karama 8%. Nambarany fa midika ho tsy fahaizan’ny mpanolotsain’ny filoha izany  paikady famonoana afo izany. “Fanaovana tsinontsinona vahoaka  sy ny mpiasa iny fampakarana  karama iny. Voatery sy  kenda vao nikoropaka… Tokony hiala  ny mpitondra rehefa  tsy hainy  ny mitondra firenena sy mametraka  politika mazava eo amin’ny toakerana  sy sosialy ary  koa ny  fametrahana ny laharam-pahamehana  eto amin’ny  firenena”,  hoy  izy.  Nanteriny fa  mitombo andro aman’alina  ny  alahelom-bahoaka, miainga any  anivon’ny  fiarahamonina  sy ny fokontany.  Efa  miaraka amin’ny mpanao politika,  ny  mpitondra  fivavahana,  ny mpiasa sy ny  sendikà izany izao ka  tsy ho  tafavoaka  intsony ny fitondrana.

Manana traikefa amin’ny fitarihana tolona… 

 Notsiahiviny fa tsy mifanalavitra amin’izao koa ny “Raharahan’ny 1991”.  “Niitatra ny fitakiana ary niafara amin’ny fialan-dRatsiraka izany niainga amin’ny fifanarahan’ny  31 oktobra. Mpikambana  tao amin’ ny  birao  politikan’ny MFM  izahay tamin’izany ary anisan’ny manana traikefa  amin’ny fanentanana sy  ny fitarihana  ny vahoaka  sy ny tolona”,  hoy  ihany Ramarosaona Franck.

Etsy andaniny, nambarany ho anisan’ny tompon’antoka amin’izao fahantrana izao ny mpamatsy  vola nanao ny fanitsiana rafitra ka lasa baranahiny ny fanalalahana.  Anisan’ny  nahavoa antsika  koa ny fidirana amin’ny vondrom-paritra, toy ny Comesa, Sadc, COI  ka tafiditra  eto avokoa ny entan’ireo  mpikambana ireo. “Ny eto amintsika anefa, tsy vonona  ka difotra satria be loatra ny fampidirana entana. Samy tompon’antoka ny mpamatsy vola  sy ireo mpitondra nifandimby…”, hoy izy.

Tokony hiaiky ny  hadisoany ny mpanelanelana

 Nitondrany  famakafakana koa  ny fidiran’ny mpanelanelana  vahiny amin’izao  raharaha izao. Nambarany fa  nitsabahan’ny UA sy ny  Sadc ny fifidianana  teto  2012. Nanao sori-dalana sy nametraka ny “Ni…  Ni”  izy ireo. Vokatr’izany izao zava-misy izao ka tokony  hiaiky aloha izy ireo fa diso  tamin’ny  nataony  teo aloha ary rangory fototry ny  afo,  araka ny nambarany. … Tonga koa  ny Sadc ary ho  avy  ny ONU. “Teratany  senegaley ny halefany  eto. Nalaza namono  Malagasy teto  anefa  izany ny taona 1947. Tsy mba manana  mpandinika fiarahamonina na sosiology ny mpitondra ka  mba niteny  hoe olon-kafa halefa aty.  Tsy  zakan’ny malagasy izany ary manambany antsika ny fanelanelanan’ny ONU”, hoy izy.

Synèse R.