Manoloana ny fanambaran’ny fianakaviamben’ny Foloalindahy, omaly, tsy azo ihodivirana ny hirosoana amin’ny fifampiresahana ahatongavana amin’ny  fifanarahana politika. Antoka ivoahana amin’izao krizy mianjady amin’ny firenena sy  ny vahoaka izao  ny fahitana marimaritra iraisana  ho amin’izany. Efa samy mandrangaranga ny hametrahana governemanta avokoa ny  rehetra. Eo  ireo mivoy ny governemanta  ho an’ny fampiraisam-pirenena. Anisan’izany ireo  sakaizan’ny mpandresy, mijapy ny lamasinina ary mitonona ho hetsika  ho amin’ny fiovana na  fanovana.

Ilaina ny olom-baovao

Mpanao politika efa fantatra teo amin’ny  tantara  izy  ireo ary  zatra kitapo latsaka amin’ny Tetezamita.

Eo  koa anefa ireo mihevitra fa ilaina  ny olom-baovao amin’izany. Mpitantana madio sy mandala ny mangarahara,  tsy mitanila ary manana fahaizana. Mila fanetren-tena rahateo  ny fitondrana ny firenena fa tsy tahaka ny nataon’ireo mpitantana teo  aloha, indrindra ny ho eo anivon’ny primatiora,  ny minisitera isan-tokony, nandatsaka ny firenena anaty kizo lalina sy   ny  fahantrana amin’izao fotoana izao.

Fihainoana  ny  feom-bahoaka… 

Midika ho  tsy  fahaiza-mitantana  izany na  heverina  aza fa manam-pahaizana sy manana traikefa avokoa ny maro amin’izy ireny. Nametraka tantara  ratsy teto amin’ny firenena ny maro amin’izy ireny. Anisan’izany ny  fanondranana an-tsokosoko  harem-pirenena… Tsy fitiavan-tanindrazana ny manao barofo sy bontolo ary koa  ny  tsy fihanoana ny feon’ny  vahoaka  sy ny fitarainany. Takaitra nateraky ny krizy nisesy teto amin’ny firenena ny  tranga miseho amin’izao fotoana  izao ka tokony  hatao vaindohan-draharaha ny  fihainoana ny  feom-bahoaka.  Hapetraka ny tamberina andraikitra…

Randria