Oops! It appears that you have disabled your Javascript. In order for you to see this page as it is meant to appear, we ask that you please re-enable your Javascript!
Flash
Préc Suiv

Lalàm-pifidianana : miantso ny HCC handray andraikitra Ravalomanana

Lalàm-pifidianana  : miantso  ny HCC handray andraikitra Ravalomanana

Nanao antso avo manoloana  ny nandanian’ny parlemanta ny lalàm-pifidianana ny filoha  teo aloha, Ravalomanana. Nitodika manokana amin’ny HCC ny tenany, manoloana ny mety ho  fanapahan-kevitra  horaisin’izy  ireo.

 « Miandraikitra ny fanajana sy fampiharana ny lalàmpanorenana hampitsahatra ny  fandikan-dalàna eo anivon’ny andrimpanjakana mpanao lalàna ianareo , ka aoka handray ny andraikitra sy araka ny feon’ny fieritreretany, ho modely hanampy ity firenena efa reraky ny fisedrana mafy ity hizotra amin’ny lalan’ny fahendrena, fahamendrehana ary fahamarinana », hoy  izy.

Niantso ny filoham-pirenena   miandraikitra ny fiarovana ny lalàmpanorenana sy miantoka sy fampandehanana tsara ny andrim-panjakana koa  ny  tenany, mba tsy sanatria ho tonga amin’ny filazana fa namadika ny lalàmpanorenana.

Tokony  handinika lalina

 Nohitsiny fa anjaran’ny tsirairay ny mandinika lalina ny voka-dratsin’ireny zava-nitranga ireny,  tamin’ny nandaniana ny lalàm-pifidianana. « Miantso ny fahatongavan-tsaina amin’ny maha olom-pirenena matotra, ary ny fitiavan-tanindrazan’ny tsirairay sy ny rehetra aho »,  hoy izy.
Nanteriny fa tsy manana ny haja sy hasina tokony homena azy amin’ny maha lalàna azy ireo volavolan-dalàna, voalaza fa nolanina tao amin’ny Antenimierampirenena. « Tsy ara-dalàna raha tsy voahaja ny fepetra takina amin’ny fanaovana ny latsa-bato nandaniana ireo lalàna momba ny fifidianana. Tsy voahaja koa ny hasina, ny filaminana ary ny soatoavin’ny Antenimierampirenena amin’ny maha Andrimpanjakana ambony azy. « Miara-mahita ary afaka milaza isika fa very hasina ny Antenimierampirenena, andrim-panjakana andrandraina fa hitondra sy hiaro ny feon’ny vahoaka », hoy  ihany  izy.  Notsiahiviny fa manatanteraka ny asany ao anatin’ny fanajana ny fitsipika fototra ny depiote, araka ny voalazan’ny  lalàna.

Tsy manaraka ny fitsipika eny amin’ny Antenimiera

Mandrara ny fanarahana baiko amin’ny fanantanterahana ny latsa-bato na baiko mivantana, na ankolaka, na amin’ny alalan’ny fanerena, na amin’ny fomba hafa  izany andininy voalazan’ny lalàmpanorenana izany,  araka ny nambarany ihany. Nohizingizininy fa tsy nanaraka ny fitsipika sy ny fomba fanaovan-draharaha mahazatra araka ny maha andrimpanjakana azy ny fepetra nanatanterahana ny latsa-bato tao amin’ny Antenimierampirenena.  « Nisy miaramila manao fanamiana tao anatin’ny efitrano fivoriana.  Nolavina ny fanisana mialoha ny nanaovana ny latsa-bato ireo solombavambahoaka tonga nivory tao.  Nolavina koa ny fandinihana sy fifanakalozan-kevitra momba ny votoatin’ireo lalàna. Mifanohitra amin’ny fitsipika mifehy ny Antenimierampirenena  izany  rehetra  izany”, hoy  ihany ny  fanambaran’ny filoha  teo  aloha, Ravalomanana.

Synèse R.

Une réponse à "Lalàm-pifidianana : miantso ny HCC handray andraikitra Ravalomanana"

  1. bordeaux33000  10/04/2018 à 22:29

    MBA mihaino fanambarana ataon i ragidro lahy filohan anteminieran doholona moa ianareo? Zany ka solo rats y azalahy.ino moa MBA maha filoha azy ao. Asa hitako misongadina ataony ao hitako!!! Raha tsy manatsara an antoko misy azy? Dia manaratsy antokon olona tsy ito y loko politikan kolikoly NY hvm njareo ao.

Les commentaires sont fermées.