Oops! It appears that you have disabled your Javascript. In order for you to see this page as it is meant to appear, we ask that you please re-enable your Javascript!
Flash
Préc Suiv

Voahitsakitsaka tanteraka ny demokrasia : nandefasana miaramila marobe Ravalo ao Ambovombe

Voahitsakitsaka  tanteraka  ny  demokrasia : nandefasana miaramila marobe Ravalo ao Ambovombe

 Voahitsakitsaka tanteraka indray ny zon’olombelona  sy ny  demokrasia  eto amintsika.  Nitohy tany Ambovombe Androy  ny barofo sy ny fanakanana ny filoha  teo aloha, Ravalomanana  sy ny Tim.

Tsy afa-bela  fa  tratry ny antsojay hatrany. Nikasa hifampiarahaba  amin’ireo  mpikamban’ny antoko any an-toerana ny  tenany  sy ireo delegasiona  notarihiny,  omaly.  Tokony  ho natao tao amin’ny tranon’ny depiote teo  aloha, Login, izany.  Toerana an’olon-tsotra sy  mitokana  fa  tsy anaty  kianja, saingy  nandefasana mpitandro filaminana maromaro nandrava izany ary namoaka an-dRavalomanana  tao amin’izany  trano  izany. Niharan’ny sakantsakana koa  ny fiara nitondra  ny filoha nasionalin’ny Tim taorian’izany satria tsy  navela  malalaka  handeha fa narahin’ny fiaran’ny  Emmo/Reg.  Noferana  tsy mahazo mivoaka ny fiara koa ny tenany hiarahabana  hiresaka amin’ny vahoaka eny an-dalana.

Voaporofo aloha  izany izao  fa  tsy voahaja ny  demokrasia sy ny fahafahana maneho  hevitra  ary ny fahafahana mivory eto amintsika amin’izao fitondrana HVM  izao.  Hatrany an-tokantranon’olon-tsotra  aza izany izao tsy azo  atao  ny mifampiarahaba sy mifampiresaka  noho ny taona  vaovao  na mifamory amin’izany  faritra manokana an’ny tena  izany.

Hitan’izao tontolo izao sy ny fianakaviambe iraisam-pirenena

Etsy andaniny, miteraka lonilony eo amin’ny maro ny fihetsiky ny mpitandro filaminana mandrava izany. Betsaka ny  asan-dahalo sy ny tsy fandriampahalemana,  indrindra any amin’iny  faritra atsimon’ny Nosy iny.  Tokony hiaro ny  vahoaka  sy  ny fananany izy ireo saingy izao zary lasa  herim-pamoretana izao noho ny  baikon’ny mpitondra.   Vao mainka hanaratsy endrika ny fitondrana avokoa izany  rehetra izany ary  hitan’izao tontolo  izao sy ny fianakaviambe iraisam-pirenena. Tsy misy  demokrasia, manjaka ny  barofo sy ny fanampenam-bava… noho  ny tahotra ?  Tombony ho an’ny Tim sy ny mpanohana azy  koa anefa izany  ary  vao mainka aza hampitombo ny fitiavan’ny olona azy, amin’izao mialoha ny fifidianana  izao.

Tsiahivina fa nihamafy ny sakana sy  ny fanelingelenana  ny  Tim  sy Ravalomanana.  Nanomboka tamin’ny fankalazana  ny faha-15 taon’ny antoko  ny  taona lasa, nokasaina  hatao  tetsy Mahamasina.  Nitohy  tany  Toamasina. Ny antsojay  tao amin’ny hotely iray any Antsiranana. Teo koa  ny fanangonana  olona vitsivitsy nanakana tany  Toliara ny fiandohan’ny taona  teo ary ny tany Taolagnaro sy Ambovombe  Androy izao.

Synèse R.

Les commentaires sont fermées.