Nofohazina tampoka indray ? “Migadra mandra-pahafaty Ravalomanana Marc, araka ny didim-pitsarana momba ny “Raharaha 7 febroary”, miaraka amin’ny miaramila roa hafa. Ara-dalàna ny fitsarana azy fa tsy marina ny filazana fa  tsy manan-kery izany”,  hoy ny  minisitry ny  Fitsarana, Rasolo Elise  Alexandrine, omaly teny Faravohitra. Notsiahiviny fa tsy teto an-toerana ny filoha  teo aloha tamin’io fotoana io fa efa sesitany  tany ivelany. “Hampahafantarina azy izany didim-pitsarana izany satria tsy natrehiny ny fitsarana. Afaka manao fanoherana anefa izy anatin’ny fe-potoana  omena ary haverina ny fitsarana. Mihatra anefa ny didim-pitsarana  ary meloka tanteraka izy raha tsy mampiakatra ny raharaha ny   filoha teo aloha raha dila izany fotoana izany”,  hoy ihany ny minisitra.

Fifidianana  andraisan’ny  rehetra anjara

Nitondra valin-kafatra ny  filoha teo aloha,  Ravalomanana. « Tsy ny fitsarana momba ny ady heloka bevava no tokony hitsara ahy fa ny Fitsarana avo (HCJ). Efa maro ny fitoriana sy fanohanana didy nataonay tany ivelany. Voafafan’ny fifanarahana politika, nataon’ny Sadc sy   ny fianakaviambe iraisam-pirenena ny fanamelohana tahaka izany…”, hoy  izy  teny Faraovohitra,  omaly.

Midika izany fa miseho izao resaka “Raharaha 7 febroary” izao, volana vitsy mialoha ny fifidianana filoham-pirenena. Andro vitsy koa taorian’ilay tranga niseho  tany Toliary farany teo,  nanakantsankanana ny hetsika nokasain’ny Tim hatao.  Hampilamina  sy hitondra fitoniana eto amin’ny firenena avokoa izany rehetra izany ? Manana ny mpanara-dia azy ity filoha teo aloha ity ary efa nandrangaranga fa ho kandidà amin’ny fifidianana filoham-pirenena ny tenany. Ny avy amin’ny fianakaviambe iraisam-pirenena,  efa nanitrikitrika  fa tokony halalaka  ary tsy misy azo ailika, handraisan’ny  rehetra anjara izany fifidianana izany. Manoloana ireo  rehetra  ireo, ho tonga hatraiza  indray  ity raharaha ity ?

Randria