Efa ho lava?  Araka ny efa nambarany, nanao fitokonana fahatelo, nanomboka teny Tsaramasay hatreny Anosy ny taxi FTAR, omaly maraina.  Tsy nahafaly ny ankamaroan’ny olona teny amin’ny manodidina teny izany.  Raikitra ny horakoraka sy siotsioka ary ny tsy fahafaliana. Mamo rahateo ny lehilahy iray anisan’ny mpitarika ny hetsiky  ny FTAR.  “ Tsy ekenay  ny fitakian’izy  ireo…  Miteraka amboteazy… Izahay  tsy  voakarama izany  fa mahatsiaro  tena ho voahelingelina ny fivelomanay andavanandro sy  ny tsena noho ny  ataon’izy   ireo… Voahelingelina izahay  fa mba andro fety izao hikaramana”, hoy ny nambaran’ireo  olona sasany teo amin’ny manodidina naneho ny tsy  fahafaliany. Tonga  teny an-toerana  anefa ny mpitandro filaminana, nandamina izany.

Afaka 15 andro ny valiny  avy amin’ny minisitera

 Na  izany  aza, noraisin’ny tale jeneralin’ny fitaterana an-tanety ao amin’ny minisiteran’ny Fitaterana, izy ireo. Nivoitra tao amin’ny fihaonana ny sosokevitra roa : ny voalohany, hajanona amin’ny kaominina Antananarivo Renivohitra ny fitantanana ny fitsirihana ny taxi, fa tsy mankany amin’ny Omavet ary tanterahina ao Antsakaviro. Faharoa, hosahanin’ny ATT ny  fitantanana ny taxi. “Mety amin’ny mpitantana ny FTAR avokoa ny sosokevita roa naroson’ny minisitera fa tsara aminy kokoa ny fandraisan’ny ATT ny raharaha satria iarahana manapaka ny zava-drehetra”, hoy ny filohan’ny FTAR, Raharinirina Clémence, omaly.  Raha ny kaominina no hisahana ny fitsirihana: ny loko, seza ary fahadiovan’ny fiara no hojerena fa tsy ny lafiny teknika velively. Afaka 15 andro no azo ny valin-teny avy amin’ny minisiteran’ny Fitaterana amin’ny sosokevitra horaisina sy hampiharina.

Randria