Oops! It appears that you have disabled your Javascript. In order for you to see this page as it is meant to appear, we ask that you please re-enable your Javascript!
Flash
Préc Suiv

Tsy fahaiza-mitantan’ny mpitondra : manao ny asan’ny sefo Zap sy ny ONG indray ny filoha

Tsy fahaiza-mitantan’ny mpitondra  : manao ny asan’ny sefo Zap sy ny  ONG indray ny filoha

 Asa andavanandro  ho an’ny  fanabeazana ny fizarana kojakojam-pianarana, tahaka  ny  natao teny Antsonjombe, omaly. Tsy ilana filoham-pirenena na praiminisitra na minisitra miditra an-tsehatra akory aza fa vitan’ny eny anivon’ny Zap ny mizara izany eny anivon’ny EPP sy  CEG. Tsy mandany  vola na  hanofana fiara marobe hampiakarana ny mpianatra eto Analamanga izany. Tsy ilana volabe angalana mpanakanto koa… Lasa fahasahiranana tadiavina sy fandaniana mihoa-pampana. Zary manao ny asan’ny ONG sy fikambanana amin’ny fanampiana madinidinika tahaka  ireny izany  izao ny fanjakana. Tsy  hoe fitaovam-pianarana maharitra taom-pianarana  telo  na efatra rahateo akory ny nozaraina. Anisan’ny olana eto  amintsika  io mifampitsabaka andraikitra sy asa io, ka tsy misy mipetraka amin’ny toerany intsony ny zava-drehetra. Tsy  fantatra intsony fa mifangaro voraka ny  iza ny manao inona. Anisan’ny tsy fahaiza-mitantana avokoa  izany.

Mbola resaka hafa ny fitohanana goavana teo amin’ny fifamoivoizana  nihazo an’Analamahitsy, omaly, mitondra fatiantoka ho an’ny toekarena, saingy efa tsy jerena  intsony izany satria efa mahazatra. Ahoana koa ny fifampitadiavana amin’ireo  ankizy marobe ireo eny Antsonjombe rehefa nirava ? Avy  rahateo  ny orana. Efa niteraka olana sy loza  ny  nampiakarana ireo  mpampianatra Fram analiny taty Antananarivo…

Mba tsy ho fisehosehoana ivelany fotsiny…

 Voalaza fa volan’ny filoha mivady ny nividianana ireny “kits” ireny,  ho an’ny mpianatra 60 000 amin’ireo CEG eto Analamanga  na 200 ihany aza aloha nozaraina,  omaly. Hitohy any an-tsekoly ny fizarana. Mbola tokony  hahazo anjara amin’izany koa ny any amin’ny faritra 21 hafa, toy ny any Midongy Atsimo na Antsakabary sy Mananjary, may  trano  sy tanàna, mba  tsy hiteraka  lonilony  na  hiheveran’ny sasany fa misy fiangarana  eto. Inoana fa mbola manam-bola hanaovana izany ny filoha mivady  fa tsy ho fisehosehoana fotsiny indray mandeha  tsy miverina…

Etsy andaniny, tsy  ratsy akory ary tena  ilaina iny fizarana “kits” iny, saingy tokony hahavitana asa hafa eny anivon’ny sekoly ny niakaran’ireo ankizy ireo  teto an-drenivohitra.

Mametraka vina mijery lavitra kokoa

 Tokony  mijery lavitra kokoa sy manana vina koa anefa  ny  mpitondra  fa  tsy manao fisehosehoana  ivelany tahaka  izao. Anisan’izany ny fametrahana ny sakafo an-tsekoly ho an’ireo ankizy  ireo. Firifiry  ireo tsy  mbola tafiditra an-tsekoly na koa nandao ny  lakilasy noho ny fahantrana sy olana maharitra iainain’izy  ireo ?  Mbola maro  ireo mianatra eny ambodihazo,  na sekoly  tsy misy  tafo. Eo koa ireo mipetraka amin’ny  tany any am-pianarana… Mbola maro  ireo sekolim-panjakana andoavan’ny ray aman-dreny vola lava izao isam-bolana…

Ankoatra izany, tsy tokony anjaran’ny filoham-pirenena ny mitarika ny tahaka ireny. Tsy fanamaivanana akory izany fa misy andraikitra tokony ifampizarana. Oviana ary taiza  ny filoha frantsay na ny mpitondra amerikanina nifandimby ka nizara “kits” ho an’ny  mpianatra ? Hafa indray raha  hoe nahavita fotodrafitrasa goavana, toy ny lalana Mainitirano mihazo an’i Tsiroanomandidy  na Vohidiala – Ambarondrazaka na koa Ambilobe-Vohémar  ny fitondrana. Tena anjaran’ny filoham-pirenena mihitsy kosa ny mitokana  izany.

Randria

Les commentaires sont fermées.