Oops! It appears that you have disabled your Javascript. In order for you to see this page as it is meant to appear, we ask that you please re-enable your Javascript!
Flash
Préc Suiv

Nijoro ny komitin’ny andrimaso demokratika… : “Avoahy ny lalàm-pifidianana hisorohana ny korontana”

Nijoro ny komitin’ny andrimaso demokratika… : “Avoahy ny lalàm-pifidianana hisorohana  ny korontana”

Fampitambaran-kery tsy hiverenan’ny krizy. Mitohy  ny ahiahin’ireo eo anivon’ny fiaraha-mientan’ny mpanao  politika  sy ny  avy amin’ny fiarahamonim-pirenena amin’izao  herintaona  mialoha  ny  fifidianana izao. “Novana ny volavolana lalàm-pifidianana efa niaraha-namolavola… Tsy  voahajan’ny komity  iraisan’ny minisitera ireo volavolan-kevitra niaraha-nidinika nandritra ny fotoana maro, nampanaovin’ny Ceni sy ny mpamatsy vola iraisam-pirenena, toy ny  Pnud, OIF… Mipetraka ny ahiahy fa hiseho ny fanovana tsy hifanandrify amin’ny efa naroson’ny komitin’ny fakan-kevitra (CCRP) hatolotry ny governemanta ny Antenimiera roa tonta”, hoy  ny fanambarana  iombonana tamin’ny  fivorian’izy  ireo, omaly,  teny Antaninarenina.  Manoloana  izany, najoron’izy ireo ny komity iombonana ho an’ny andrimaso demokratika hiatrehana ny fifidianana (CVDE) ary nametraka fitakiana  maromaro.

Tsy maintsy hatao amin’ny 2018 ny  fifidianana

 

Anisan’izany ny hamoahan’ny fitondrana, tsy misy hatakandro amin’ny io volavolan-dalàna mialoha ny fandrosoana azy eo amin’ny filan-kevitry ny governemanta, ary indrindra mialoha ny hampandaniana azy ho lalàna eny anivon’ny parlemanta. Tsy mijanona  eo. “Takianay ny hampielezana ny lalàna hisy mba ho eken’ny besinimaro ny lalàm-pifidianana  eto amin’ny tany sy ny firenena hisorohana ny korontana mety hitranga mialoha, mandritra ary ao aorian’ny fifidianana”, hoy  ihany izy  ireo. Mitaky ny hanajana ny lalàmpanorenana milaza fa dimy taona ihany ny fe-potoana itondran’ny filoham-pirenena, lany. “Noho izany, tsy maintsy hatao amin’ny 2018 ny fifidianana filoham-pirenena. Miantso ireo fianakaviambe iraisam-pirenena hanohana ny Malagasy amin’izao ezaka atao izao hametrahana marina ny demokrasia  koa  izahay »,  hoy  izy ireo.

Anisan’ny mandrafitra ny mpikambana ao CVDE ny mpikambana ao amin’ny CCRP sy ny CSP, ary hatevenin’ireo filohan’antoko politika sy fiarahamonim-pirenena na ireo solontenany. “Hiarahan’ny rehetra manao ary tsy voatery ho fanoherana ihany ny  hetsika rehetra hatao fa tsy maintsy hisy fanentanana ny mpifidy  rehetra ho tonga saina amin’ny safidy hataony”, hoy ihany izy  ireo.

Hanao amboletra  sy kilalao maloto  ny fitondrana…

Araka izany,  ahina ho nofinofy ny fifidianana  demokratika sy mangarahara manoloana  izao hetsiky ny mpanao  politika sy ny fiarahamonim-pirenena izao. Efa fantatra rahateo ny fihetsik’ireo parlemantera ireo amin’ireo volavolàn-dalana nandalo teny. Tsy mba mahay maka  lesona amin’ny  tantara ny mpitondra fa  manao amboletra sy tsy te hahalala afa-tsy ny tombontsoany ary miketrika amin’ny fomba rehetra hijanonana  eo amin’ny  fitondrana, ka manomana  lalao maloto sy fitsipi-dalao sadasada,  toy ny  efa nahazo ny mpanao  gazety…

Randria  

 

Les commentaires sont fermées.