« Aoka izay ity filalaovana ny filoha Ravalomanana ity… Atsaharo ny lalao maloto. Raharaha maro ny tao anatin’ilay bokibe voalaza fa nisy nangalatra fa tsy ny azy ihany tamin’ireny raharaha tamin’ny taona 2009- 2010 ireny, kanefa ny azy ihany no voizin’ny sasany ?”, hoy ny Me Razafimanantsoa Hanitra, omaly teny Antaninarenina.  Tsiahivina fa nokasaina ho natao omaly alatsinainy   ny fitsarana  an-dRalitera Andrianandriana sy ny kaomisera Mbinina, momba ny “Raharaha  2009”. Anisan’izany ny “Raharaha 7 feboary”, niampangan’ny fitondrana Tetezamita azy  ireo. Nifanindry amin’izany anefa ny vaovao fa nisy namaky ny tribonaly ny asabotsy  teo ka very tao ny antontan-taratasy lehibe momba ny filoha teo aloha, Ravalomanana. Nosamborina ny olona akaiky sy ny mpisolovava ity mpitondra teo aloha  ity. “ Mahagaga fa nosavaina ny  zoma teo ny  tranoko. Ny asabotsy, nivoaka tamin’ireo gazety mpomba ny fitondrana ny  fahavakisan’ny fitsarana… “, hoy Ralitera.

Nogiazana ny volan’ny filoha teo aloha…

 Tsy nijanona eo fa nambara ho nangalatra  izany antontan-taratasy  izany ny fianakaviana  mipetraka ao aminy  vao tonga avy any andafy ny zoma  teo ary nosamborina koa.  “Ankoatra izany, nogiazana ny volanay telo  mirahalahy. Ny an’ny filoha Ravalomanana  sy ny kaomisera Mbinina ary ny tenako Ralitera Andrianandraina. Voalaza anefa fa 19 izahay no voarohirohy tamin’ny “Raharaha 7 febroary”. Ny ambiny izany manao ahoana ? Mamoromporona indray ny fitondrana satria efa manakaiky ny fifidianana amin’ny taona 2018”, hoy ity  olona  akaiky an-dRavalomanana ity.

Araka  izany, ho tonga  hatraiza ny  raharaha ary iza sy inona no tena kendrena amin’izao  raharaha izao ?

Randria