Flash
Préc Suiv

Filoha lefitry ny Ceni, Rakotonarivo Thierry : “Aoka tsy hanana fiandaniana ny fanjakana amin’ny fifidianana”

Filoha lefitry ny Ceni, Rakotonarivo Thierry : “Aoka tsy hanana fiandaniana ny fanjakana amin’ny fifidianana”

 Anisan’ny nisongadina tamin’ny  fanehoan-kevitry ny filoha lefitry ny Ceni, Rakotonarivo Thierry,  nivahiny tao amin ‘ny fandaharana Ambarao, ao amin’ny Alliance 92, omaly, ny fanomanana ny fifidianana. Teo koa ny antso avo sy fanentanana   ho an’ny  rehetra… Ampahan’ny resadresaka.

Miantso fiaraha-miasa  amin’ny governemanta izahay mba havoaka  haingana ahafahana manazava ny sain’ny vahoaka  ireo didy aman-dalàna hifehy   ny fifidianana ary omena toky koa  izy ireo fa hisy ny fifidianana ary hampafantarina ny vahoaka ny hatao. Aoka hitazona  ny tsy fiandaniany ny fanjakana mialoha sy mandritra ary aorian’ny fifidianana”, hoy izy. Niantso fiaraha-miasa amin’ny mpanao politika koa ny Ceni amin’ny fanentanana sy ny fanabeazana ny vahoaka. Eo koa ny tokony hifanarahan’ny mpanao politika ka hametrahana ny  fitsipika  sy ny fitondran-tena hitondrana  io fifidianana io ary ho eken’izy ireo ny vokatra mivoaka eo, araka ny nambarany. Nentaniny koa ny fiarahamonim-pirenena amin’ny fanabeazana sy fanentanana ary ny  fanaraha-maso ny fifidianana. “ Manentana  ny mpifidy, satria ain’ny fifidianana sy ain’ny firenena  izany”, hoy  izy.

Na izany aza, nambarany hatreto aloha tsy mbola fantatra ny lalao hatao. Hanao fitsapan-kevi-bahoaka ihany ve ? Hanao fifidianana depiote mialoha ny fotoana ? Atambatra ny fifidianana depiote sy filoham-pirenena, araka  ny fanontaniany. “Marobe ny resaka tsy ahazoana fanamarinana amin’ny tompon’andraikitra manana fahefana amin’izany. Miteraka fahasahiranana amin’ny fanomanana ny fifidianana izany. Tsy mazava ny lalàna hatramin’izao”, hoy ihany izy. Nohitsiny fa maro ireo mitaky  ny tokony  hakana hevitra  mialoha  ny hamoahana ny lalana satria tsy lalàna tsotra  io. “Lalàna hifehezana ny fifaninanana handraisan’ny maro anjara izany ka raha tiana ny hamoaka vokatra eken’ny rehetra,  tsy maintsy eken’ny rehetra mialoha ny fitsipi-dalao. Mazava ho azy fa tsy hahazo fankatoavan’ny maro  anisany vokatra eo raha tsy hitovian’ny rehetra hevitra  ny lalàna”, hoy Rakotonarivo Thierry.

Nihena ny tahan’ny mpifidy… 

Nambarany  fa resy lahatra izy ireo raha fifidianana tsy azo antoka hamoaka vokatra eken’ny rehetra ny hiseho eo  ary hiteraka korontana izany. “Tsy ho marin-toerana sy tsy afaka hiroso amin’ny  fampandrosoana satria tsy mahazo  ny fanohanana  sy fanampiana avy amin’ny vahoaka”, hoy ihany izy.

Notsiahivin’ity filoha lefitra ity koa fa tsy miala amin’ny lalàmpanorenana izy ireo ary tsy misy mibaiko  na mandray baiko na avy amin’iza na iza. Miasa amin’ny feon’ny  fieritreterany sy ny lalàna velona  amin’ny fanomanana  fifidianana, araka ny nambarany.

Na izany aza anefa, manana ahiahy ny Ceni amin’ny fandraisana anjaran’ny mpifidy nefa

antoka lehibe ahazoana ny ho  feneken’ny maro ny valim-pifidianana sy ho fanekena ny fitondrana marim-pototra izany. “Kely ny finoana ary manahy amin’izany izahay satria nihena hatrany ny fandraisana anjaran’ny mpifidy sy ny fisoratana anaty lisi-pifidianana hatramin ‘ny taona 1992 no ho mankaty”, hoy ny Ceni. Notsiahiviny fa mihena ny fisoratana anaty lisitra, ny isan’ny olona mandatsa-bato  ary ny latsa-bato ataon’ny olona.  Tsy latsa-bato tompon’andraikitra fa baikon’ny tombontsoa na teren’ny tahotra. Tsy baikon ‘ny fandaharanasan’ny kandidà na ny fampandrosoana firenena,  araka ny fanahiany. Efa miezaka anefa ny Ceni ka anisan’ny vahaolana ny fanabezana  sy ny fanentanana ny vahoaka.

Etsy andaniny,  nanome  toky ny vahoaka ny Ceni fa hangarahara tanteraka ny zotram-pifidianana, manomboka amin’ny lisi-pifidianana. Iangaviana fiaraha-miasa amin’ny mpanao politika  sy ny fiarahamonim-pirenena izany. “ Ho mpikambana eo anivon’ny  Ceni avokoa ny solontenan’ny kandidà ary hiaraka hanapa-kevitra  sy mivory.  Tsy vitan’izany fa  azon’ny  besinimaro atrehina ny voka-pifidianana ary havoaka isaky ny birao fandatsaham-bato (BV) mihitsy fa tsy vokatra amin’ny ankapobeny tahaka ny teo aloha. Ekena koa ny fampitahana ny voka-pifidianana, miainga amin’ny fitantanana an-tsoratra ( PV)”, hoy izy.

Hametraka tantara ho an’ny taranaka

 Nentaniny ny rehetra dieny izao mba hisoratra anaty lisi-pifidianana satria hifarana  ny 31 janoary izany  satria tsy afaka mifidy intsony hatramin’ny  31 desambra  2018…”Aoka isika hihazakazaka hanao izany. Zava-dehibe ny fifidianana satria hametraka tantara ho an’ny firenena ny fifidna  hatao ary hotsarain’ny  tantara isika mpifidy amin’izao fotoana izao. Hisoratra anarana amin’ny lisi-pifidianana, ho tonga hifidy ary hanao latsa-bato tompon’andraikitra…”, hoy Rakotonarivo Thierry.

Synèse  R.

Laisser une réponse

Votre adresse email ne sera pas rendue publique