Flash
Préc Suiv

Jery taratra… herinandro  : azo tarafina ny hoavy…

Ao anaty loto sy fako Antananarivo Renivohitra. Nilaza ny ben’ny Tanàna fa tsy andraikitry ny kaominina ny fako fa ny fanadiovana ny tanàna, nefa vitany raha omena azy. Nanome 156 tapitrisa Ar ny fanjakana foibe, ary 132 tapitrisa Ar isam-bolana hatramin’ny marsa hanalana ny fako.

Nihena ho 300 tapitrisa Ar ny 1,5 tapitrisa euros takin’ireo mpaka an-keriny an’i Arnaud, anadahin’i Annie izay efa novonoin’ireo mpaka an-keriny, any Toamasina. Efa nisy ny mpandraharaha voarohirohy, voasambotra ary alaina am-bavany. Tsy mbola fantatra izay misy an’i Arnaud.

Tsy araka ny lalàmpanorenana ny fanomezana 400 tapitrisa Ar isaky ny distrika, araka ny fanapahan’ny HCC. Tsy araka ny lalàmpanorenana ny fitantanan’ny depiote izany vola izany, fa ny olom-boafidy eny ifotony ihany. Tokony hohafainganina ny fifidianana eny anivon’ny faritra sy ny faritany.

Vita ny fifidianana loholona. Amin’ny ankapobeny, nanjakan’ny antoko HVM tanteraka izany. Nefa nandeha ihany ny resabe ny amin’ny fividianana mpifidy vaventy, ny fanerena hifidy kandidàm-panjakana… Hoeken’ny rehetra ny voka-pifidianana eo? Na hisy ny fahamarinan-toerana…

Manahy tondra-drano sy hiady irery amin’izany ny mponina eny amin’ny faritra iva, raha ny eto Antananarivo Renivohitra sy ny manodidina. Saika avy isan’andro ny orana. Mitohy hatrany ny fahatapatapahan’ny jiro amin’ny tanàn-dehibe maro. Tsy manome antoka noho ny toetr’andro ny Jirama.

Nilaza ny filohan’ny Repoblika tamin’ny kabary famaranan-taona fa taom-pisedrana ary taom-pamazana sy fitsimohana ny taona 2015. Nahavita dingana lehibe i Madagasikara, fa niverina ny fifandraisaina iraisam-pirenena, tonga ny famatsiam-bola. Mila apetraka ny fitoniana sy fahamarinan-toerana.

Azo tarafina amin’izany rehetra izany ny hoavy amin’izao taona vaovao izao? Hatramin’ny fotoana farany, tsy hita izay fanovana amin’ny fanatsarana ny fiainam-bahoaka. Mihamafy sy mihasarotra aza… Na eo aza ny jery todika ny lasa, tsy azo avela ny jery atrika ny hoavy tsy maintsy irosoana.

R. Nd.

Les commentaires sont fermées.